07:20 م
السبت 05 أغسطس 2023
كتبت- منى الموجي:
قال الكاتب والسيناريست محمد صلاح العزب، إنه حرص على تقديم أعمال متنوعة منذ بداية مشواره الفني، وألا يتم حصره في نوعية محددة.
وتابع في تصريحات خاصة لـ”اخبار مصر”بحب طول الوقت أكون متنوع واحساسي الشخصي إن اللي جاي هو اللي أنا عايز أقوله، صحيح الحمد لله حققت نجاحات بس فيه حاجات وأنماط وطرق كتابة كتير حابب إني أقدمها”.
وأضاف العزب ” الحمد لله قدمت أعمالا حققت نجاحات كبيرة، وتواجد جيد، والفترة الحالية أخطط للتواجد أكثر في السينما وبشكل مميز عن السائد”.
وعن سر تأخر خطوة التركيز في الأعمال السينمائية، وانشغاله لسنوات بالدراما التليفزيونية، أوضح “السينما متأخرتش طول الوقت كان عندي تعاقدات على أفلام، وكان بيبقى المفروض ندخل نصور، كان فيه فيلم (أوضتين وصالة)، وفيلم آخر مع المخرج خالد يوسف وخلصناه وكنا داخلين نصور وجاهزين بطولة عمرو سعد، ومن فترة قريبة فيلم ثالث مع أحمد السبكي ومحمود كامل اسمه (سوء تفاهم)، وبتحصل حاجة قدرية توقف أو تأجل المشروع، أتمنى ده ميحصلش في الحاجات اللي جاية”.
وينتظر محمد صلاح العزب عرض مسلسله “سفاح الجيزة” شهر أغسطس الجاري على منصة شاهد VIP، ويتكون من 8 حلقات، مستوحى من أحداث حقيقية، ويشارك في بطولة المسلسل النجوم أحمد فهمي، باسم سمرة، حنان يوسف وصلاح عبدالله، والعمل من تأليف محمد صلاح العزب وورشة كتابة إنجي أبو السعود وعماد مطر، وإخراج هادي الباجوري.
